Marko Rubio: Tramp İranla “pis razılaşmaya” getməyəcək

ABŞ Prezidenti Donald Tramp Yaxın Şərqdə gərginlik fonunda artan benzin qiymətlərindən istifadə edilərək Vaşinqton üçün sərfəli olmayan razılaşmanın əldə olunmasına icazə verməyəcək. Bunu ABŞ dövlət katibi Marko Rubio bildirib.

Rubio NBC News-a müsahibəsində deyib ki, “Prezident açıq şəkildə bildirib ki, əgər iranlılar daxili siyasətimizdən istifadə edərək bizə pis bir razılaşmanı qəbul etdirməyə çalışsalar, bu baş verməyəcək”.

O əlavə edib ki, ABŞ-da yanacaq qiymətlərinin sabitləşdirilməsi üçün artıq tədbirlər görülüb və “onlar azalacaq”.

Tramp isə çərşənbə axşamı bildirib ki, İranla bağlı vəziyyət fonunda amerikalıların maliyyə çətinlikləri onu narahat etmir, əsas prioritet İranın nüvə silahı əldə etməsinin qarşısını almaqdır.

“Eybi yoxdur. İran məsələsində vacib olan tək şey onların nüvə silahına malik olmamasıdır”, - Tramp jurnalistlərə deyib.

ABŞ Prezidenti həmçinin İran hakimiyyətini “düzgün addım atmamaq” halında “işi təkbaşına bitirəcəyi” ilə hədələyib və Vaşinqtonun yalnız “yaxşı bir razılaşma” əldə edəcəyini bildirib.

Aytac