NYT: ABŞ İrana qarşı intensiv hücumları bərpa etməyə hazırlaşır

ABŞ Prezidenti Donald Trump administrasiyası diplomatik səylərin nəticə verməyəcəyi halda, İrana qarşı hərbi əməliyyatların bərpası ssenarilərini nəzərdən keçirir.Bu barədə “The New York Times” məlumat verib.

Trampın müşavirləri mümkün eskalasiya halında daha genişmiqyaslı bombardman da daxil olmaqla, zərbələrin yenidən başlanmasına dair planlar hazırlayıblar. Bununla belə, ABŞ prezidenti hələ yekun qərar verməyib.

Məlumata görə, paralel olaraq bir sıra ölkələr Tehranı Hörmüz boğazının açılmasına razı salacaq və Vaşinqtona əməliyyatı siyasi uğur kimi təqdim etməyə imkan verəcək kompromis variant üzərində işləyir.

Tramp jurnalistlərə açıqlamasında İranın son sülh təklifini “qəbuledilməz” adlandırıb və ABŞ maraqlarına uyğun olmayan təşəbbüsləri müzakirə etməyə hazır olmadığını bildirib.

NYT-nin məlumatına əsasən, hərbi planlara İranın hərbi infrastrukturuna genişləndirilmiş hava zərbələri, eləcə də yeraltı nüvə obyektlərinə qarşı xüsusi təyinatlı qüvvələrin mümkün istifadəsi daxildir. Regionda artıq on minlərlə ABŞ hərbçisi, aviadaşıyıcı qruplar və döyüş təyyarələri yerləşdirilib.

İran rəsmiləri isə yeni hücum halında “qətiyyətli cavab” veriləcəyi barədə xəbərdarlıq ediblər.