WUF13: “Bakı mənzil böhranından real həllərə keçid üçün mesaj verməlidir” — UN-Habitat

Qlobal mənzil böhranı artıq yalnız sosial deyil, həm də bərabərlik, dayanıqlılıq və insan hüquqları böhranına çevrilib. Bunu Bakıda keçirilən Ümumdünya Şəhərsalma Forumunun (WUF13) açılışında çıxış edən BMT-nin Məskunlaşma Proqramının (UN-Habitat) icraçı direktoru Anaklaudia Rossbax bildirib.


O qeyd edib ki, dünyanın müxtəlif regionlarında hökumətlər əlçatan mənzil siyasətini genişləndirir. Latın Amerikası və Karib hövzəsində sosial mənzil layihələri və nəqliyyat yönümlü şəhərsalma inkişaf edir, Yaxın Şərqdə mənzil siyasəti iqtisadi şaxələndirmə ilə əlaqələndirilir, Avropa və Şimali Amerikada isə əlçatan mənzil, kirayə tənzimlənməsi və tikinti təklifinin artırılması istiqamətində islahatlar gücləndirilir.

Rossbaxın sözlərinə görə, şəhərlər mənzil sistemləri çökdüyü halda inkişaf edə bilməz.

“İnsanlar evlərini itirəndə yalnız dam və divarlarını deyil, təhlükəsizliklərini, dolanışıq imkanlarını və aidiyyət hissini də itirirlər",- o deyib.
UN-Habitat rəhbəri vurğulayıb ki, iqlim dəyişikliyi ilə mübarizə və mənzil siyasəti artıq ayrı-ayrı müzakirə edilə bilməz.

Onun sözlərinə görə, bu gün tikilən evlər gələcəyin iqlim risklərinə davamlı olmalıdır.

Rossbax bildirib ki, mənzil yalnız sosial ehtiyac deyil, həm də güclü iqtisadi mühərrikdir və maliyyə sistemləri spekulyasiyanı deyil, insanların mənzilə çıxışını maliyyələşdirməlidir.

O əlavə edib ki, hazırda dünyada təxminən 3 milyard insan qeyri-adekvat yaşayış şəraitində yaşayır, 1 milyarddan çox insan gecəqondularda məskunlaşıb, 300 milyon nəfər isə evsizlik problemi ilə üzləşir.
UN-Habitat rəhbəri deyib ki, təşkilatın qlobal mənzil böhranı üçün bütün cavabları yoxdur, lakin hər bir iştirakçı bu problemin həllinin bir hissəsini daşıyır.

“Bakı iyulda BMT Baş Assambleyasının yüksək səviyyəli iclasına aydın mesaj göndərməlidir: mənzil böhranını sadəcə tanımaqdan konkret siyasətlərə, investisiyalara və fəaliyyətə keçmək lazımdır",- o əlavə edib.

Gülnar Nazimqızı