Almaniya Türkiyənin cənub-şərqində "Patriot" kompleksi yerləşdirəcək

Almaniya Yaxın Şərqdə artan gərginlik fonunda Türkiyənin cənub-şərqinə “Patriot” hava hücumundan müdafiə sistemləri yerləşdirəcək və bölgəyə təxminən 150 hərbçi göndərəcək.

Almaniya Müdafiə Nazirliyinin açıqlamasına görə, Şlezviq-Holşteyn federal əyalətinin Xuzum şəhərindən göndəriləcək hərbçilər və “Patriot” zenit-raket kompleksləri iyunun sonundan sentyabr ayınadək Türkiyədə yerləşdiriləcək. Onlar bölgədəki ABŞ hərbi kontingentini əvəz edəcəklər.

Almaniyanın müdafiə naziri Boris Pistorius bildirib ki, Berlin NATO daxilində məsuliyyətini artırır və bunu alyansın şərq, şimal və Türkiyədəki cənub-şərq cinahlarında nümayiş etdirir.

Bundesver sonuncu dəfə 2013–2015-ci illərdə NATO-nun “Active Fence” missiyası çərçivəsində Türkiyənin Kahramanmaraş şəhəri yaxınlığında, Suriya sərhədindən təxminən 120 km məsafədə “Patriot” sistemləri yerləşdirmişdi.