Rossbax: Qeyri-formal yaşayış məskənləri humanitar və insan hüquqları məsələsidir

BMT Baş katibinin müavini və UN-Habitat-ın icraçı direktoru Anaklaudiya Rossbax qeyri-formal yaşayış məskənləri probleminin təxirəsalınmaz humanitar və insan hüquqları məsələsi olduğunu açıqlayıb.

Onun sözlərinə görə, Yeni Şəhər Gündəliyinin icrasının ara mərhələdə nəzərdən keçirildiyi bir vaxtda dünya bu sahədə mövcud problemləri açıq şəkildə qəbul etməlidir.

Rossbax qeyd edib ki, qeyri-formal yaşayış məskənləri ilə bağlı ilk mühüm məsələ onların tanınması və düzgün məlumat bazasının formalaşdırılmasıdır.

Bu, Dayanıqlı İnkişaf Məqsədlərinin 11.1-ci hədəfinin monitorinqi üçün vacibdir.

“Qeyri-formal yaşayış məskənləri həm yerli, həm də milli səviyyədə -siyahıyaalma və statistika qurumları tərəfindən tanınmalıdır”, - o bildirib.

UN-Habitat rəhbəri vurğulayıb ki, bu ərazilərə yalnız problem kimi deyil, həm də imkan məkanları kimi baxmaq lazımdır.

Onun sözlərinə görə, Qlobal Cənubda insanlar şəhərlərə təhsil, səhiyyə, iş və digər imkanlara çıxış əldə etmək üçün gəlirlər və çox vaxt qeyri-formal yaşayış məskənlərində məskunlaşırlar.

Rossbaxın sözlərinə görə, torpağın sosial və ekoloji funksiyası nəzərə alınmalı, artıq formalaşmış yaşayış məskənləri yerləşdikləri ərazilərdə kompleks şəkildə həll olunmalıdır.

O, ikinci əsas istiqamət kimi inteqrasiyanı qeyd edib.

Rossbax bildirib ki, bu sahədə mənzil, xidmətlər, sosial infrastruktur, ictimai məkanlar, mədəniyyət və nəqliyyat sektorları birlikdə işləməlidir.

UN-Habitat rəhbəri həmçinin Asiya və Afrikanın bir çox ölkələrində qeyri-formal nəqliyyat sistemlərinin sonradan formal şəhər nəqliyyatı ilə əlaqələndirildiyini vurğulayıb.

Gülnar Nazimqızı