Anqolada qızıl mədənində torpaq sürüşməsi olub, azı 28 nəfər ölüb

Anqolanın şimal-qərbində qanunsuz qızıl hasilatı aparılan şaxtada baş verən torpaq sürüşməsi nəticəsində azı 28 nəfər həlak olub.

Anqola İnformasiya Agentliyi Benqo vilayətinin hakimiyyət orqanlarına istinadən xəbər verir ki, hadisə zamanı dörd nəfər xilas edilib.

Benqo polisi nümayəndəsi Qaşpar Luis İnasio bildirib ki, ölənlərin hamısı 18-40 yaş aralığında kişilərdir.

Şahidlərin sözlərinə görə, şaxtanın yerləşdiyi ərazidə iri torpaq kütləsinin qəfil sürüşməsi nəticəsində yeraltında çalışan şəxslər dağıntılar altında qalıb.

Hazırda xilasedicilər axtarış-xilasetmə əməliyyatlarını davam etdirirlər. Rəsmi məlumata əsasən, iki nəfər itkin düşmüş hesab olunur. Yerli sakinlər isə şaxtada daha 70 nəfərin qala biləcəyini bildirirlər.

İlkin ehtimallara görə, torpaq sürüşməsinə son üç gündə bölgədə müşahidə olunan güclü yağışlar səbəb olub.