Aİ Ermənistana 50 milyon avrodan çox dəstək paketi hazırlayır

Avropa İttifaqı (Aİ) Rusiyanın Ermənistan məhsullarına tətbiq etdiyi idxal məhdudiyyətləri fonunda Ermənistana 50 milyon avrodan çox həcmdə təcili maliyyə yardımı nəzərdə tutan dəstək paketi hazırlayır.

Bu barədə Aİ-nin açıqlamasında Ermənistanın baş naziri Nikol Pashinyan ilə Avropa Komissiyasının prezidenti Ursula von der Leyen arasında keçirilən telefon danışığından sonra məlumat verilib.

Fon der Lyayen bildirib ki, Aİ Ermənistan iqtisadiyyatının təsirlənən sektorlarına məqsədli dəstək göstərəcək və ölkə ilə iqtisadi əməkdaşlıq və nəqliyyat bağlantılarının inkişafını dərinləşdirəcək.

“Rusiyanın Ermənistana qarşı son məhdudiyyətləri iqtisadi təzyiq nümunəsidir və bu qəbuledilməzdir”, - o qeyd edib.

Aİ rəhbəri əlavə edib ki, Moskvanın Ermənistan məhsullarına tətbiq etdiyi ixrac məhdudiyyətləri iqtisadi münasibətlərdən siyasi təzyiq vasitəsi kimi istifadə edilməsi anlamına gəlir.

Açıqlamaya görə, dəstək paketi çərçivəsində 50 milyon avrodan çox təcili maliyyə yardımı ayrılacaq. Bundan başqa, Ermənistanın bəzi məhsulları, xüsusilə kənd təsərrüfatı və ərzaq məhsulları üçün ticarət prosedurlarının sadələşdirilməsi nəzərdən keçirilir.

Fon der Lyayen bildirib ki, Rusiyanın Ermənistan çiçəklərinin idxalına qoyduğu məhdudiyyətlərdən sonra bu sahəyə də praktiki dəstək göstəriləcək. Onun sözlərinə görə, Ermənistandan göndərilən 10 min çiçəkdən ibarət ilk partiyanın yaxın günlərdə Latviyaya çatdırılması planlaşdırılır.

Tərəflər həmçinin bütün təşəbbüslərin icrasına nəzarət etmək məqsədilə birgə Aİ-Ermənistan İşçi Qrupunun yaradılması barədə razılığa gəliblər.

Fon der Lyayen qeyd edib ki, Ermənistan Avropa, Cənubi Qafqaz və Mərkəzi Asiyanı birləşdirən strateji nəqliyyat və logistika mərkəzinə çevrilə bilər. O, Aİ-nin regional nəqliyyat marşrutlarının və sərhəd-keçid infrastrukturunun inkişafına dəstək verməyə hazır olduğunu bildirib.

Rusiya son aylarda Ermənistanın bir sıra kənd təsərrüfatı məhsullarının, o cümlədən çiçək ixracının ölkəyə girişinə məhdudiyyətlər tətbiq edib. Ermənistan hökuməti bu addımların ölkə ixracatçılarına mənfi təsir göstərdiyini bildirir.

Aİ son illərdə Ermənistanla iqtisadi əməkdaşlığı genişləndirib. Brüsselin məlumatına görə, 2024-cü ildən həyata keçirilən Dayanıqlılıq və İnkişaf Planı çərçivəsində 7 minə yaxın biznesə dəstək göstərilib və 20 mindən çox iş yerinin yaradılmasına töhfə verilib. 

Gülnar Nazimqızı