Ermənistan Aİ üzvü olmağa hazır deyil - Paşinyan

Ermənistanın Baş naziri Nikol Paşinyan ölkənin hazırda Avropa İttifaqına (Aİ) daxil olmaq üçün namizəd statusu almağa hazır olmadığını bildirib. Bu barədə o, yerli televiziya kanalları tərəfindən yayımlanan brifinqdə bildirib.

Baş nazir qeyd edib ki, Aİ ilə bağlı referendum yalnız ölkənin üzvlük və ya namizəd statusu üçün rəsmi müraciəti olduğu halda keçirilə bilər.

“Ermənistan ən azı rəsmi şəkildə Aİ-yə üzvlük üçün müraciət etməli və ya namizəd statusuna malik olmalıdır. Hazırda bunların heç biri yoxdur, çünki obyektiv olaraq buna hazır deyilik”, – Paşinyan bildirib.

O, əlavə edib ki, ölkənin bu istiqamətdə irəliləməsi üçün əlavə islahatlara ehtiyac var və hökumət islahat prosesini sürətləndirməyi planlaşdırır.

Baş nazir, həmçinin Ermənistanın Avrasiya İqtisadi Birliyində (AİB) üzvlüyünün qurum daxilində konsensus əsasında qərarların qəbul edilməsi səbəbindən risk altında olmadığını bildirib. Onun sözlərinə görə, Ermənistanın təşkilatda veto hüququ mövcuddur.