Ermənistanda seçki məntəqələrinə bomba qoyulması ilə bağlı saxta xəbərdarlıqlar yayılıb

Ermənistanda keçirilən parlament seçkiləri zamanı bəzi seçki məntəqələrində bomba yerləşdirilməsi ilə bağlı kütləvi saxta xəbərdarlıqlar yayılıb.

“Armenpress” agentliyinin məlumatına görə, bu barədə Ermənistan Daxili İşlər Nazirliyi bildirib.

Nazirliyin açıqlamasında deyilir ki, vətəndaşların xarici telefon nömrələrinə və elektron poçt ünvanlarına bəzi seçki məntəqələrində bomba olduğu barədə zənglər və mesajlar göndərilib.

DİN-in məlumatına əsasən, hüquq-mühafizə orqanlarının həyata keçirdiyi operativ yoxlamalar nəticəsində xəbərdarlıqların həqiqəti əks etdirmədiyi müəyyən olunub.

Nazirlik hadisəni seçki prosesini pozmağa yönəlmiş kibertəxribat kimi qiymətləndirib. Qurumun bəyanatında qeyd olunub ki, bu cür hərəkətlər cəmiyyətdə təşviş yaratmaq və dövlət strukturlarının fəaliyyətinə mane olmaq məqsədi daşıyan hibrid təsir cəhdi hesab edilə bilər.

Daxili İşlər Nazirliyi polis və digər hüquq-mühafizə orqanlarının vəziyyətə nəzarət etdiyini bildirərək vətəndaşları təsdiqlənməmiş məlumatları yaymamağa və şübhəli mesajlar barədə aidiyyəti qurumlara məlumat verməyə çağırıb.