XİN - dən Azov dənizində yaralanan azərbaycanlıların vəziyyəti barədə açıqlama

Azov dənizində yük gəmilərinə qarşı həyata keçirilən dron hücumu nəticəsində Azərbaycan vətəndaşlarının həlak olması və yaralanması barədə məlumat daxil olduqdan sonra Azərbaycanın Rusiyadakı səfirliyinin əməkdaşları hadisə yerinə yollanıblar.Bu barədə Azərbaycan Xarici İşlər Nazirliyi məlumat yayıb.

Bildirilib ki, səfirliyin konsulluq bölməsinin əməkdaşları hazırda Yeysk şəhərindədir və yaralanan, eləcə də xilas edilən Azərbaycan vətəndaşlarına müvafiq konsulluq dəstəyi göstərirlər.Yaralıların vəziyyəti qənaətbəxşdir və onlardan bir neçəsinin yaxın vaxtlarda xəstəxanadan buraxılması gözlənilir.

Nazirliyin məlumatına əsasən, Rusiya tərəfinin həyata keçirdiyi axtarış-xilasetmə əməliyyatları çərçivəsində həlak olan şəxslərin kimliklərinin müəyyənləşdirilməsi və digər zəruri prosedurlar davam etdirilir.

Eyni zamanda, xilas edilən Azərbaycan vətəndaşlarının sənədləşdirilməsi, onlara qayıdış şəhadətnamələrinin verilməsi və ölkəyə qayıdışlarının təşkili istiqamətində tədbirlər görülür.

Xarici İşlər Nazirliyi hadisəni xüsusi nəzarətdə saxladığını və aidiyyəti qurumlarla əlaqələndirməni davam etdirdiyini bildirib.

Nazirlik həlak olan şəxslərin kimlikləri və cənazələrinin Azərbaycana gətirilməsi ilə bağlı əlavə məlumatın ictimaiyyətə təqdim ediləcəyini qeyd edib.