Ombudsman uşaqların rəqəmsal mühitdə müdafiəsinin gücləndirilməsini dəstəkləyib

Uşaqların rəqəmsal mühitdə zərərli məzmun və təsirlərdən qorunması məqsədilə qanunvericiliyin təkmilləşdirilməsi zəruridir. Bunu Azərbaycanın İnsan Hüquqları üzrə Müvəkkili (Ombudsman) Səbinə Əliyeva bildirib.

Əliyeva bu barədə Milli Məclisdə yaş məhdudiyyəti tətbiq edilən sosial şəbəkə platformalarının fəaliyyəti ilə bağlı qanun layihəsinin müzakirəsi zamanı çıxışında deyib.

Onun sözlərinə görə, rəqəmsal texnologiyalar uşaqlar üçün yeni imkanlar yaratmaqla yanaşı, onları müxtəlif risklərlə də üz-üzə qoyur. Ombudsman qeyd edib ki, Azərbaycan uşaqların rəqəmsal mühitdə müdafiəsini nəzərdə tutan bir sıra beynəlxalq konvensiyalara qoşulub və bu sahədə milli qanunvericiliyin təkmilləşdirilməsi istiqamətində addımlar atır.

Əliyeva bildirib ki, Ombudsman təsisatı daha əvvəl uşaqların sosial şəbəkələrdən və digər rəqəmsal platformalardan istifadəsinə dair məhdudiyyətlərin müəyyənləşdirilməsi ilə bağlı qanunvericiliyə dəyişikliklər təklif edib və bu məsələ illik məruzələrdə əksini tapıb.

O qeyd edib ki, Prezidentin 27 fevral 2026-cı il tarixli sərəncamı ilə uşaqların rəqəmsal mühitdə zərərli məzmun və təsirlərdən qorunması istiqamətində əlavə tədbirlər müəyyənləşdirilib.

Ombudsmanın sözlərinə görə, müzakirə olunan qanun layihəsi yaş məhdudiyyəti tətbiq edilən sosial şəbəkə platformalarının fəaliyyəti üzərində nəzarətin gücləndirilməsinə, hüquq pozuntularının qarşısının alınmasına və uşaqların hüquqlarının daha effektiv müdafiəsinə xidmət edəcək.

Əliyeva deyib ki, Ombudsman Aparatının araşdırmaları interaktiv platformalar və onlayn oyunların uşaqlar üçün müəyyən risklər yaratdığını göstərir. O, yaş məhdudiyyətlərinin bəzi hallarda formal xarakter daşıdığını, effektiv nəzarət mexanizmlərinin və şəxsi məlumatların qorunması sahəsində kifayət qədər təminatların olmadığını bildirib.

Ombudsman dövlət qurumlarını rəqəmsal platformalar üzərində nəzarət mexanizmlərini gücləndirməyə, valideynləri uşaqların internetdən istifadəsinə daha diqqətlə yanaşmağa, media nümayəndələrini isə mövzuya uşaqların mənafeləri baxımından yanaşmağa çağırıb.

Əliyeva bildirib ki, Ombudsman Aparatı paytaxt və regionlarda uşaqların rəqəmsal təhlükəsizliyi, kiberbullinq və şəxsi məlumatların qorunması mövzularında mütəmadi maarifləndirmə tədbirləri keçirir.

Gülnar Nazimqızı