Özümüzü aldatmayaq, uşaqlardan telefonu almaq mümkün deyil - Rəşad Məcid

Müasir dövrdə uşaqların mobil telefon və rəqəmsal texnologiyalardan istifadəsinin qarşısını tam almaq mümkün deyil və buna görə də risklərin idarə olunmasına yönəlmiş mexanizmlər yaradılmalıdır. Bunu Mətbuat Şurasının sədri Rəşad Məcid deyib. 

“Özümüzü aldatmayaq, uşaqların əlindən telefonu almaq qeyri-mümkündür. Süni intellekt alətləri artıq onların təhsil prosesində də istifadə olunur”, – o bildirib.

Məcidin sözlərinə görə, uşaqların zərərli məzmunlardan qorunmasında yalnız hüquqi mexanizmlər deyil, həm də ictimai nəzarət və məsuliyyət mühüm rol oynayır.

“İctimai qınaq olmalıdır. Virtual məkanda da məsuliyyət və qınaq mexanizmləri formalaşmalıdır”, – o deyib.

O əlavə edib ki, texnologiyaların sürətli inkişafı səbəbindən qanunvericilik bir sıra hallarda yeniliklərin arxasınca çatmaqda çətinlik çəkir. Məcid qeyd edib ki, sosial şəbəkə platformalarının provayderlərinin qarşıdakı dövrdə hansı texniki həllər tətbiq edəcəyi hələ məlum deyil.

Bununla belə, onun fikrincə, müxtəlif filtrasiya və təhlükəsizlik mexanizmləri vasitəsilə uşaqları müəyyən zərərli vərdişlərdən və riskli məzmunlardan uzaq saxlamaq mümkündür.

Gülnar Nazimqızı