Natiq Məmmədli: Qanun cəmiyyətə düzgün izah olunmalı və imkanlar kimi təqdim edilməlidir

Yaş məhdudiyyəti tətbiq edilən sosial şəbəkə platformaları ilə bağlı qanun layihəsinin cəmiyyətə düzgün izah edilməsi vacibdir. Bunu Medianın İnkişafı Agentliyinin direktor müavini Natiq Məmmədli Milli Məclisdə çıxışı zamanı deyib. 

Məmmədli deyib ki, qanunla bağlı müxtəlif yanaşmalar və fikirlər formalaşacağı gözlənilir və bu baxımdan ictimai kommunikasiya prosesində təşəbbüsün ələ alınması vacibdir.

“Bizim üzərimizə düşən məsələ qanunu cəmiyyətə düzgün izah etməkdir. Bu informasiya məsələsində təşəbbüsü ələ almalıyıq”, – o bildirib.

Onun sözlərinə görə, qanun ictimaiyyətə yalnız məhdudiyyətlər kimi deyil, həm də yeni imkanlar yaradan bir tənzimləmə aktı kimi təqdim edilməlidir.

“Qanunu qadağadan çox yeni imkanlar yaradan sənəd kimi göstərməliyik. Uşaqlara da lazımi və təhlükəsiz informasiya təqdim edilməlidir”, – Məmmədli əlavə edib.

Gülnar Nazimqızı