Uşaqların rəqəmsal təhlükəsizliyi və ailə dəyərlərinin qorunması prioritet olaraq qalır

Uşaqların və yeniyetmələrin rəqəmsal mühitdə təhlükəsizliyinin təmin edilməsi, onların hüquqlarının qorunması və ailə dəyərlərinin təşviqi dövlət siyasətinin əsas istiqamətlərindən biridir.

Bunu Ailə, Qadın və Uşaq Problemləri üzrə Dövlət Komitəsinin şöbə müdiri, hüquq üzrə fəlsəfə doktoru Elgün Səfərov deyib.

Onun sözlərinə görə, uşaqlar və yeniyetmələr internetdə və sosial şəbəkələrdə qarşılaşdıqları təhlükələri hər zaman düzgün qiymətləndirə bilmirlər. Bu səbəbdən onların rəqəmsal savadlılığının artırılması, valideynlərin maarifləndirilməsi və aidiyyəti qurumlarla vətəndaş cəmiyyəti təşkilatlarının əməkdaşlığının gücləndirilməsi vacibdir.

Səfərov bildirib ki, insan alveri, narkotik vasitələrin qanunsuz dövriyyəsi və digər transmilli cinayətlərlə mübarizə fonunda uşaqların onlayn məkanda qorunmasına xüsusi diqqət yetirilməlidir.

O qeyd edib ki, Azərbaycanda elektron xidmətlərin inkişafı istiqamətində mühüm addımlar atılıb. Onun sözlərinə görə, ASAN xidmət, MyGov və digər rəqəmsal platformalar vətəndaşların dövlət xidmətlərinə çıxışını asanlaşdırıb. Bununla yanaşı, yetkinlik yaşına çatmayanların elektron xidmətlərdən istifadə səviyyəsinin artırılması və rəqəmsal bacarıqlarının inkişaf etdirilməsi də önəmli məsələlərdən biridir.

Aytac Zeynalova