Kitabxanaların bağlanmasından söhbət gedə bilməz - nazir

Ölkədə kitabxana sisteminin fəaliyyətinin təkmilləşdirilməsi məqsədilə 2023-cü ildən geniş monitorinqlər aparılır. Bunu mədəniyyət naziri Adil Kərimli Milli Məclisdə “Kitabxana sisteminin mövcud vəziyyəti və inkişaf perspektivləri” mövzusunda keçirilən ictimai dinləmədə deyib. 

Nazirin sözlərinə görə, araşdırmalar Mədəniyyət Nazirliyinin tabeliyində fəaliyyət göstərən kitabxanaların infrastrukturunu, kadr potensialını, kitab fondlarını və məzmun fəaliyyətini əhatə edib.

"Üç il ərzində kifayət qədər geniş məlumat bazası formalaşıb. Bu məlumatlar sistemləşdirilib və peşəkar mütəxəssislərin iştirakı ilə təhlil olunub. Kitabxana sahəsi çox həssas yanaşma tələb edir. Çünki kitabxanalar milli bilik mənbəyi kimi cəmiyyət üçün strateji əhəmiyyət daşıyan əsas təsisatlardandır", - nazir vurğulayıb.

Kərimli qeyd edib ki, dövlət başçısının Mədəniyyət Nazirliyi qarşısında qoyduğu əsas vəzifələrdən biri də bu sahədə fəaliyyətin təkmilləşdirilməsidir. Onun sözlərinə görə, məqsəd kitabxana sistemini müasir tələblərə uyğunlaşdırmaq, daha səmərəli və dayanıqlı fəaliyyət modelini formalaşdırmaqdır.

Nazir bildirib ki, bu istiqamətdə konseptual yanaşma artıq hazırlanıb və planlaşdırılan yeniliklərlə bağlı daha ətraflı məlumat təqdim olunacaq.

Adil Kərimli cəmiyyətdə kitabxanaların bağlanacağı ilə bağlı yayılan fikirlərə də münasibət bildirib.

"Bəzən cəmiyyətdə belə fikirlər səslənir ki, Mədəniyyət Nazirliyi kitabxanaları bağlayır və ya bu sahəyə soyuq münasibət göstərir. Əsla belə deyil. Kitabxanalar dövlətimiz üçün prioritet sahədir. Məlumatın əldə olunması, biliklərin yayılması və maarifləndirmə baxımından onların rolu əvəzsizdir. Məqsədimiz kitabxanaları zəiflətmək deyil, onları daha güclü, daha müasir və cəmiyyət üçün daha əlçatan etməkdir", -  nazir əlavə edib.