NATO Rusiya sərhədi yaxınlığında hərbi təlimlərə başlayıb

Litva, Polşa və Fransa iyunun 16-26-da Rusiya ilə həmsərhəd Kalininqrad vilayəti və Belarus yaxınlığında yerləşən Suvalki dəhlizi bölgəsində “Gallant Boar 2026” (“Cəsur qaban”) birgə hərbi təlimləri keçirəcək. Bu barədə Litva Ordusu məlumat yayıb.

Məlumata görə, təlimlərdə Litvanın “Jemaitija” Piyada Briqadasının bölmələri, eləcə də Polşa və Fransa Silahlı Qüvvələrinin hərbçiləri iştirak edəcək. Manevrlərin əsas məqsədi müttəfiq qüvvələr arasında birgə əməliyyatların icrası və fəaliyyətlərin koordinasiyasının təkmilləşdirilməsidir.

Litva Ordusunun bildirdiyinə görə, təlimlər zamanı iştirakçı ölkələrin hərbi hazırlıq səviyyəsinin artırılmasına, həmçinin strateji əhəmiyyət daşıyan Suvalki dəhlizinin sürətli və effektiv müdafiəsi üçün zəruri bacarıqların inkişafına xüsusi diqqət yetiriləcək.

Bununla yanaşı, NATO iyunun 8-də başlayan və 12 gün davam edəcək “Ramstein Flag 2026” hava təlimlərini keçirir. Təlimlərdə 19 ölkə iştirak edir və manevrlər Danimarka, Finlandiya, Norveç, İsveç və İspaniya ərazilərini əhatə edir.

Daha əvvəl Böyük Britaniyanın “Challenger 2” tanklarını Estoniyanın Rusiya ilə sərhədə yaxın bölgəsində yerləşdirdiyi, ABŞ və Böyük Britaniyanın isə Belarus sərhədi yaxınlığında birgə hərbi təlimlər keçirdiyi bildirilmişdi.