İsrailin Beyruta hücumu zamanı "Hizbullah" komandirlərindən biri həlak olub - Yenilənib

İsrail ordusunun Dahiyədəki "Hizbullah" komanda mərkəzinə endirdiyi aviazərbələr zamanı qruplaşmanın komandirlərindən biri həlak olub.Bu barədə "Al Hadath" məlumat yayıb.

Telekanalın məlumatına görə, İsrail ordusu Qobeyri rayonunda "Hizbullah"ın qərargah ofisinin yerləşdiyi beşmərtəbəli binaya hücum edib. Qeyd olunur ki, adı açıqlanmayan həlak olmuş komandir qruplaşmanın Livanın cənubu və şərqindəki birləşmələri arasında operativ rabitənin təşkilinə cavabdeh idi.

İsrail Müdafiə Ordusunun mətbuat xidmətinin bəyanatında deyilir ki, komanda mərkəzi "Hizbullah" tərəfindən İsrail vətəndaşlarına və Livanın cənubunda fəaliyyət göstərən əsgərlərə qarşı terror hücumları hazırlamaq üçün istifadə edilib.

***

İsrail Müdafiə Ordusu "Hizbullah"ın hücumuna cavab olaraq Livanın paytaxtı Beyrutun Dahiya rayonunda qruplaşmanın obyektlərinə zərbələr endirib.Bu barədə İsrailin Baş naziri Benyamin Netanyahu və müdafiə naziri İsrael Katsın birgə bəyanatında deyilir.

"Hizbullah" öz növbəsində rəsmi "Telegram" kanalında bildirib ki, Livanın Nəbatiyə vilayətinin Əl-Ədissa şəhərində İsrail ordusunun yeni yaradılmış artilleriya mövqeyinə raketlə zərbə endirib.

İsrail hərbçiləri bildiriblər ki, "Hizbullah" İsrailin şimal rayonlarına üç mərmi atıb və bu, atəşkəs rejiminin ciddi şəkildə pozulmasıdır. Mərmilərin Şomra və Şlomi yaşayış məntəqələri yaxınlığına düşdüyünü əlavə edən qurum, bunun ötən həftəsonu əraziyə düşən iki mərmidən əlavə olaraq baş verdiyini qeyd edib.