ABŞ prokurorluğu Maduro işi üzrə məhkəmənin iyulun sonunadək təxirə salınmasını istəyib

ABŞ federal prokurorluğu Venesuelanın keçmiş prezidenti kimi təqdim olunan Nikolas Maduro və həyat yoldaşı Siliya Floreslə bağlı cinayət işi üzrə növbəti məhkəmə iclasının təxirə salınması üçün məhkəməyə müraciət edib.

Nyu-Yorkun Cənub Dairəsi üzrə ABŞ prokuroru Cey Kleytonun imzaladığı sənədə əsasən, ittiham tərəfi müdafiə tərəfinin razılığı ilə məhkəmə iclasının 30 iyun 2026-cı il tarixindən 22 iyul 2026-cı il tarixinə keçirilməsini xahiş edib.

Prokurorluq bildirib ki, iş üzrə yeni materialların müdafiə tərəfinə təqdim olunması və vəkillərin həmin sənədlərlə tanış olması üçün əlavə vaxta ehtiyac yaranıb.

Maduro və Flores ABŞ-da narkotik qaçaqmalçılığı və əlaqəli cinayətlərdə ittiham olunurlar. Hər iki şəxs ittihamları rədd edərək günahsız olduqlarını bəyan ediblər.

ABŞ məhkəməsində baxılan bu iş 2026-cı ilin əvvəlindən beynəlxalq diqqət mərkəzindədir. Maduro və Flores yanvarda ABŞ-a gətirildikdən sonra Nyu-York federal məhkəməsində irəli sürülən ittihamlar üzrə özlərini təqsirli bilmədiklərini açıqlayıblar. İş üzrə məhkəmə prosesi bir neçə dəfə təxirə salınıb və tərəflər arasında əsas mübahisələrdən biri müdafiənin maliyyələşdirilməsi və sübut materiallarının araşdırılması ilə bağlıdır.

Aytac