Eurostat: Danimarka Aİ-də ən bahalı ölkə olub

2025-ci ildə Danimarkada mal və xidmətlərin qiymət səviyyəsi Avropa İttifaqında (Aİ) ən yüksək olub. Bu barədə Eurostat məlumat yayıb.

Məlumata görə, Danimarkada qiymət səviyyəsi Aİ üzrə orta göstəricinin 140 faizini təşkil edib. Sonrakı yerlərdə 136 faizlə İrlandiya və 132 faizlə Lüksemburq qərarlaşıb.

Ən aşağı qiymət səviyyəsi isə 63 faizlə Bolqarıstanda qeydə alınıb. Onu 65 faizlə Rumıniya və 73 faizlə Polşa izləyib.

Eurostatın hesablamalarına görə, ötən il Aİ-də ən böyük xərc kateqoriyalarından biri olan mənzil xərcləri üzrə ən yüksək göstərici İrlandiyada qeydə alınıb və ittifaq ortalamasının 190 faizinə çatıb. Bu kateqoriyada ən aşağı göstərici isə Bolqarıstanda müşahidə olunub və 41 faiz təşkil edib.

Qida və spirtsiz içkilər kateqoriyasında ən yüksək qiymətlər Lüksemburqda qeydə alınıb. Burada qiymət səviyyəsi Aİ orta göstəricisinin 122 faizi həcmində olub. Ən aşağı göstərici isə 80 faizlə Rumıniyada müşahidə edilib.