İtaliyanın İrandakı səfirliyi Bakıdan Tehrana qaytarılıb

İtaliyanın İrandakı səfirliyi fəaliyyətini Tehranda bərpa edib.Bu barədə ISNA xəbər verir.

Bildirilir ki, İtaliya Respublikasının Tehrandakı diplomatik nümayəndəliyi iyunun 19-dan etibarən yenidən fəaliyyətə başlayıb. 

Səfirlik bir müddət əvvəl regionda yaranan təhlükəsizlik vəziyyəti səbəbindən müvəqqəti olaraq bağlanmış və diplomatik missiya Bakıya köçürülmüşdü. İtaliya XİN-in məlumatına görə, qərar İtaliyanın İrandakı diplomat və əməkdaşlarının təhlükəsizliyinin təmin edilməsi məqsədi ilə qəbul edilmişdi. 

Daha əvvəl Roma hökuməti səfirliyin müvəqqəti bağlanması və əməkdaşların Azərbaycana təxliyə edilməsi barədə qərar vermişdi. Diplomatik fəaliyyət isə həmin müddətdə Bakıdan həyata keçirilirdi. 

İtaliyanın xarici işlər naziri Antonio Tayani parlamentdə bildirib ki, Tehrandakı səfirlik regionda vəziyyətin sabitləşməsindən və İran–ABŞ arasında əldə olunan razılaşmalardan sonra yenidən açılır. 

Son həftələrdə bir sıra Avropa ölkələri də təhlükəsizlik vəziyyəti ilə əlaqədar İrandakı diplomatik fəaliyyətlərini mərhələli şəkildə bərpa etməyə başlayıb.