Qrafiklə su verilən rayonların siyahısı açıqlanıb

Bakıda su anbarlarına qəbul edilən suyun həcminin və sutəmizləyici qurğuların məhsuldarlığının artırılması məqsədilə aparılan texniki işlərlə əlaqədar bir sıra ərazilərdə suyun verilməsi müvəqqəti olaraq məhdudlaşdırılıb.

İri Şəhərlərin Birləşmiş Su Təchizatı Xidmətindən bildirilib ki, görülən işlər nəticəsində müxtəlif rayonlarda su təchizatının saatlarında 2-3 saatlıq azalmalar tətbiq olunur. Hazırda tənzimləmə işləri yekunlaşmaq üzrədir və mütəxəssislərin hesablamalarına görə, növbəti iki gün ərzində su təchizatının tam stabilləşdirilməsi və normal rejimin bərpası mümkün olacaq.

Hazırda tətbiq olunan müvəqqəti qrafikə əsasən:

• Xətai və Nizami rayonlarının bəzi ərazilərində su 06:00-10:00 və 18:00-22:00 saatlarında verilir;
• Suraxanı rayonunun müxtəlif hissələrində su təchizatı 06:00-17:00, 06:00-19:00 və 22:00-01:00 saatları arasında həyata keçirilir;
•  
• Binəqədi və Nərimanov rayonlarının bəzi ərazilərində su 06:00-20:00 saatlarınadək verilir;
•  
• Yasamal rayonunda fərqli ərazilər üzrə 06:00-10:00, 06:00-22:00 və 18:00-22:00 qrafikləri tətbiq olunur;
•  
• Sabunçu rayonunun bəzi hissələrində su 08:00-12:00 və 22:00-02:00 saatlarında verilir;
•  
• Xəzər rayonunun bəzi ərazilərində su təchizatı 00:00-12:00 saatları arasında təmin edilir;
•  
• Pirallahı rayonunun bəzi yaşayış məntəqələrində su 08:00-17:00 saatlarında verilir;
•  
• Nəsimi rayonunun bəzi ərazilərində isə su 06:00-10:00 və 18:00-21:00 saatlarında verilir.

Qurum qeyd edib ki, bəzi ünvanlarda, xüsusilə yuxarı mərtəbələrdə yaşayan abonentlərin su ilə təminatında daha ciddi çətinliklər müşahidə olunur. Belə ərazilərdə sukanal idarələri tərəfindən su maşınları vasitəsilə xidmət göstərilir.

İri Şəhərlərin Birləşmiş Su Təchizatı Xidməti yaranmış müvəqqəti narahatlığa görə abonentlərdən üzr istəyib və işlərin fasiləsiz şəkildə davam etdirildiyini bildirib.