İlham Əliyev Birləşmiş Ərəb Əmirliklərinin milli təhlükəsizlik müşavirini qəbul edib

Azərbaycan Prezidenti İlham Əliyev sentyabrın 14-də Birləşmiş Ərəb Əmirliklərinin (BƏƏ) milli təhlükəsizlik müşaviri, Əbu-Dabi Əmirliyi hakim müavini Şeyx Tahnun bin Zayed Al Nəhyanı qəbul edib.

Şeyx Tahnun bin Zayed Al Nəhyan BƏƏ Prezidenti Şeyx Məhəmməd bin Zayed Al Nəhyanın salamlarını Azərbaycan Prezidentinə çatdırıb.

İlham Əliyev salamlarına görə təşəkkürünü bildirib və öz salamlarını BƏƏ Prezidentinə çatdırmağı xahiş edib.

Görüşdə Azərbaycan ilə BƏƏ arasında strateji tərəfdaşlıq münasibətlərinin uğurla inkişaf etdiyi, ikitərəfli əməkdaşlığın müxtəlif sahələrdə genişləndiyi bildirilib.

Münasibətlərin inkişafında iki ölkə prezidentlərinin şəxsi dostluq münasibətlərinin, qarşılıqlı səfərlərinin və görüşlərinin mühüm rol oynadığı vurğulanıb.

Tərəflər əməkdaşlıq məsələlərinin müzakirəsi baxımından BƏƏ-dən böyük nümayəndə heyətinin Azərbaycana səfərinin əhəmiyyətini qeyd ediblər.

Görüşdən sonra İlham Əliyev və Şeyx Tahnun bin Zayed Al Nəhyanın iştirakı ilə sənədlərin imzalanması mərasimi keçirilib.

Mərasimdə bərpaolunan enerji, investisiya, mədənçıxarma, data mərkəzləri, yüksək performanslı hesablama, süni intellekt infrastrukturu və təbii qaz sahələrində əməkdaşlığı nəzərdə tutan bir sıra sənədlər imzalanıb.

Sənədlər arasında “Masdar” ilə “Azərbaycan Yaşıl Enerji Şirkəti” MMC arasında bərpaolunan enerji layihələrinin işlənib hazırlanmasına dair əməkdaşlıq sazişi, Azərbaycan İnvestisiya Holdinqi ilə “L'IMAD HOLDING COMPANY PJSC” arasında strateji əməkdaşlıq sazişi, “AzerGold” QSC ilə “Terra Mining Ltd” arasında Naxçıvanın mineral-xammal potensialının və mədən sahələrinin birgə qiymətləndirilməsi və kəşfiyyatına dair saziş yer alıb.

Bundan əlavə, İqtisadiyyat Nazirliyi ilə “GROUP 42 Holding Ltd” arasında Azərbaycanda data mərkəzinin, yüksək performanslı hesablama və süni intellekt infrastrukturunun inkişafına dair anlaşma memorandumu, İqtisadiyyat Nazirliyi ilə “XRG SGC LIMITED” arasında “Cənub Qaz Dəhlizi” QSC ilə bağlı səhmdarlar müqaviləsi imzalanıb.

Həmçinin Energetika Nazirliyi, SOCAR və “Masdar” arasında Neftçala 315 MVt gücündə günəş fotovoltaik layihəsi üzrə maliyyə bağlanışının baş tutmasını təsdiqləyən sənəd imzalanıb.