Fransada paraşütçüləri daşıyan təyyarənin qəzaya uğraması nəticəsində 11 nəfər ölüb

Fransanın şimal-şərqindəki Tomblen qəsəbəsində paraşütçüləri daşıyan kiçik mülki təyyarənin qəzaya uğraması nəticəsində göyərtədə olan 11 nəfərin hamısı həlak olub.

Yerli hakimiyyət orqanlarının məlumatına görə, təyyarə havaya qalxdıqdan qısa müddət sonra yerə çırpılıb və alovlanıb. Təyyarədə bir pilot, beş paraşüt təlimatçısı və tandem paraşütü ilə ilk dəfə tullanmağa hazırlaşan beş sərnişin olub.

Hadisə yerinə xilasedicilər və yanğınsöndürmə briqadaları cəlb olunub. Yerli prokurorluq və Fransa aviasiya təhlükəsizliyi qurumları qəzanın səbəblərinin araşdırılmasına başlayıb.