NYT: Tramp ailəsi ilə əlaqəli investorlar Qazaxıstandakı volfram layihəsində pay əldə ediblər

ABŞ prezidenti Donald Trampın oğullarına qismən məxsus olan şirkətlə əlaqəli investorlar Qazaxıstanda həyata keçirilən iri volfram mədən layihəsi ilə bağlı müəssisədə 20%-lik pay əldə ediblər. Bu barədə The New York Times qəzeti məlumat yayıb.

Nəşrin yazdığına görə, ötən ilin sentyabrında ABŞ administrasiyası Qazaxıstan Prezidenti Kasım-Jomart Tokayev ilə danışıqlar apararaq ABŞ şirkətinin dünyanın ən böyük işlənməmiş volfram yataqlarından birinə çıxış əldə etməsinə dəstək verib.

The New York Times iddia edir ki, sonradan Donald Trampın böyük oğulları Donald Tramp Jr. və Erik Trampın qismən sahib olduqları Dominari Securities ilə əlaqəli investorlar digər tərəfdaşlarla birlikdə layihə üzrə yaradılmış korporativ strukturda 20%-lik pay əldə ediblər.

Qəzetin məlumatına əsasən, Cantor Fitzgerald də layihənin maliyyələşdirilməsində iştirak edib. Bildirilir ki, şirkət Qazaxıstan layihəsində Dominari Securities ilə əməkdaşlıq edən əsas investorlardan biri ilə əlaqəli qurum üçün 210 milyon dollar vəsaitin cəlb olunmasına kömək edib.

Məlumata görə, Cantor Fitzgerald şirkəti ABŞ-ın Ticarət katibi Hovard Latnikın ailəsi tərəfindən idarə olunur, şirkətin fəaliyyətinə isə onun oğulları Brandon və Kayl Latnik rəhbərlik edirlər.

The New York Times yazır ki, sövdələşmə ABŞ administrasiyasının Mərkəzi Asiyada strateji əhəmiyyət daşıyan kritik minerallara çıxışını genişləndirmək siyasəti fonunda baş tutub. Volfram müdafiə sənayesi, elektronika və yüksək texnologiyalar istehsalında istifadə olunan əsas xammallardan hesab edilir. Nəşrin irəli sürdüyü iddialarla bağlı Ağ Ev və xəbərdə adı çəkilən şirkətlər tərəfindən hələlik rəsmi açıqlama verilməyib.

Gülnar