Neapol yaxınlığında 4,7 bal gücündə zəlzələdən sonra 60-a yaxın afterşok qeydə alınıb

İtaliyanın Neapol şəhəri yaxınlığındakı Flegrean Fields (Campi Flegrei) vulkanik bölgəsində 4,7 bal gücündə zəlzələdən sonra seysmik aktivlik davam edir.

ANSA agentliyinin məlumatına görə, əsas zəlzələ son 40 ildə bölgədə qeydə alınan ən güclü yeraltı təkan olub. Həmin vaxtdan bəri seysmoloqlar təxminən 60 afterşok qeydə alıblar. Onların əksəriyyəti zəif olub, ən güclüsü isə səhər saatlarında baş verən 3,1 bal gücündə zəlzələ olub. Təkanlar Pozzuoli, Bacoli və Neapolun bəzi rayonlarında hiss edilib.

Rəsmi məlumata görə, ölən yoxdur. Bacoli şəhərinin meri Josi Gerardo Della Rajone bəzi qayaların qopması və binalardan suvağın tökülməsi halları qeydə alınsa da, aparılan yoxlamalar nəticəsində yaşayış üçün yararsız bina aşkarlanmadığını bildirib.

Bununla belə, yerli KİV-lər 20-40 nəfərin müxtəlif dərəcəli xəsarətlər aldığını iddia edir. Bu məlumat hələlik rəsmi qurumlar tərəfindən təsdiqlənməyib.

Yanğınsöndürənlər və xilasedicilər təhlükəsizlik yoxlamalarını davam etdirirlər. Gecə ərzində Sanino küçəsindən 18 ailə, San Vitaliano küçəsindən isə 4 ailə ehtiyat tədbiri olaraq təxliyə edilib.

Zəlzələdən sonra Pozzuoli limanının fəaliyyəti dayandırılıb. Dənizçilik orqanları qayalı sahil ərazilərinə girişin məhdudlaşdırılmasını planlaşdırır.

Neapol prefekturası vəziyyəti qiymətləndirmək üçün bələdiyyə rəhbərləri, mülki müdafiə, polis və xilasetmə xidmətlərinin iştirakı ilə fövqəladə koordinasiya iclası keçirib.