Ermənistan hökuməti yeni parlamentin ilk iclası günü istefa verib

Ermənistan hökuməti yeni seçilmiş Parlamentin IX çağırışının ilk iclası günü Konstitusiyanın tələbinə uyğun olaraq istefa verib.

Baş nazir Nikol Paşinyan hökumətin istefası ilə bağlı müraciəti imzaladığını açıqlayıb. Onun sözlərinə görə, sənəd Konstitusiyanın 158-ci maddəsinə əsasən ölkə prezidentinə göndəriləcək və prezident hökumətin istefasını qəbul edəcək.

Paşinyan bildirib ki, yeni hökumət formalaşdırılanadək hazırkı Nazirlər Kabinetinin üzvləri öz vəzifələrini icra etməyə davam edəcəklər.

Baş nazir qeyd edib ki, Konstitusiyanın 149-cu maddəsinə əsasən, yeni seçilmiş parlamentin səlahiyyət müddəti başladıqdan sonra parlament çoxluğunun irəli sürdüyü namizəd prezident tərəfindən dərhal baş nazir təyin olunacaq. Onun sözlərinə görə, parlament çoxluğu baş nazir postuna namizədi bu gün prezidentə təqdim edəcək.

Ermənistan Konstitusiyasına əsasən, yeni seçilmiş parlamentin ilk iclası günü hökumət istefa verməlidir. Bunun ardınca parlament çoxluğu baş nazir vəzifəsinə namizəd irəli sürür, prezident isə həmin namizədi təyin edir. Yeni hökumət formalaşdırılanadək əvvəlki hökumət fəaliyyətini müvəqqəti olaraq davam etdirir.