Fransada ərazinin 70%-də su istifadəsinə məhdudiyyət qoyulub

Fransada son aylarda müşahidə olunan istilik dalğaları və quraqlıq ölkənin su ehtiyatlarına təzyiqi artırıb və ərazinin təxminən 70%-də su istifadəsinə məhdudiyyətlər tətbiq olunub. Bu barədə Euronews məlumat yayıb.

Fransa hökumətinin məlumatına görə, son üç ayda ölkə bir neçə istilik dalğasının təsirinə məruz qalıb. Yüksək temperatur və yağıntı çatışmazlığı quraqlığı daha da dərinləşdirib, rekord temperatur göstəricilərinə, genişmiqyaslı meşə yanğınlarına və minlərlə əlavə ölümə səbəb olub.

Fransanın Ekoloji Transformasiya Nazirliyi bildirib ki, ölkədə xüsusilə şiddətli quraqlıq müşahidə olunur və iqlim dəyişikliyinin təsirləri su ehtiyatlarına təzyiqi artırır. Nazirliyin məlumatına görə, ölkə ərazisinin təxminən 70%-də su istifadəsinə müxtəlif səviyyələrdə məhdudiyyətlər tətbiq edilir.

Məhdudiyyətlərin səviyyəsindən asılı olaraq bağların və yaşıllıqların suvarılması, hovuzların doldurulması, avtomobillərin yuyulması və kənd təsərrüfatı sahələrinin suvarılması kimi fəaliyyətlərə qadağa və ya məhdudiyyətlər qoyulur.

Ən yüksək böhran səviyyəsinin tətbiq edildiyi ərazilərdə su əsasən səhiyyə, mülki müdafiə, içməli su təchizatı və sanitariya kimi prioritet ehtiyaclara yönəldilir. Avqustun 9-na olan məlumata görə, Fransanın 101 departamentindən 67-si ən yüksək böhran səviyyəsində olub.

 2026-cı ilin iyulu Fransada indiyədək qeydə alınmış ən isti ay olub. Ölkənin meteoroloji xidməti Météo-France həmin ay yağıntı çatışmazlığının ölkə üzrə təxminən 70%-ə çatdığını bildirib. Eyni zamanda, içməli su ehtiyatlarının əsas mənbələrindən olan yeraltı suların təxminən üçdə ikisinin səviyyəsi normadan aşağı düşüb.

Fransanın Ekologiya naziri Monik Barbu iyulun sonunda bəzi ərazilərdə içməli su təchizatının təzyiq altında olduğunu, 30 mindən çox insanın artıq su kəsintilərindən təsirləndiyini bildirib.