MİDA güzəştli mənzil seçimində yeni qaydalar tətbiq edəcək

Mənzil İnşaatı Dövlət Agentliyi (MİDA) “Güzəştli mənzil” sistemi üzrə mənzil seçimi prosesini dəyişib və növbəti satış zamanı yeni seçim mexanizmləri tətbiq edəcək.

Agentliyin məlumatına görə, satış günü ilk olaraq “ünvan üzrə” seçim aktiv olacaq. Vətəndaşlar əvvəlcədən müəyyən etdikləri mənzili ünvanı üzrə axtararaq onun real vaxt rejimində satış statusunu görə biləcəklər. Daha sonra “xəritə üzərində” və “parametrlər üzrə” seçim imkanları aktivləşdiriləcək.

MİDA bildirib ki, yeniliklərin məqsədi mənzil seçimində yol verilən səhvlərin qarşısını almaq və prosesi daha sürətli və rahat etməkdir.

Gözləmə qaydasında mənzil seçimi zamanı vətəndaşlar əvvəlcədən seçilməmiş mənzillərin statusu barədə məlumat əldə edə biləcəklər.

Bundan başqa, “Seçimlər” mərhələsində layihənin adı, ödəniş üsulu və mənzil seçimi üsulu ayrıca səhifələrdə təqdim olunacaq.

Yeni qaydalara əsasən, vətəndaş mənzili seçdikdən sonra ərizəsini ayrıca imzalayıb təqdim etməli olmayacaq. “Təsdiq et” düyməsini seçdikdən sonra ona avtomatik olaraq “Ərizəçi” statusu veriləcək.

MİDA vətəndaşların yeni seçim mexanizmi ilə tanış olması üçün rəsmi saytında ayrıca bölmə yaradıb. 4 sentyabr 2026-cı ildə satışa çıxarılacaq mənzillər barədə məlumat da həmin bölmədə yerləşdirilib.