DİN-də işləmək istəyənlər üçün yeni vakansiya elan edilib

Daxili İşlər Nazirliyi (DİN) Bakı şəhərində yerləşən qurumlarında vakant inspektor-tərcüməçi vəzifələrinə xidmətə qəbul üçün müsabiqə elan edib.

Müsabiqədə dövlət ali təhsil müəssisələrini bitirən, 20-30 yaş aralığında, xarici dil bilən və tərcümə bacarıqlarına malik Azərbaycan vətəndaşları iştirak edə bilərlər.

Namizədlər həqiqi hərbi xidmət müddətini tam başa vurmuş olmalıdır. Bu tələb qadınlara şamil edilmir. Həmçinin namizədlərin Bakı şəhərində qeydiyyatda olması və yaşaması tələb olunur.

Tərcüməçi kimi iş təcrübəsi olan namizədlərə üstünlük veriləcək. Namizədlərin sağlamlıq vəziyyəti və bilik səviyyəsi müəyyən edilmiş normativlər əsasında yoxlanılacaq.

Müraciətlər 20 avqust–20 oktyabr 2026-cı il tarixlərində qəbul ediləcək. Namizədlər DİN-in rəsmi saytında yerləşdirilən elektron ərizə formasını və qısa anket məlumatlarını [email protected] elektron poçt ünvanına göndərməlidirlər.

Ətraflı məlumatla DİN-in rəsmi saytında tanış olmaq mümkündür.