3 yaşlı uşağın ət maşınında amputasiya olunan əli 8 saatlıq əməliyyatla bərpa edilib

Azərbaycanda 3 yaşlı oğlan uşağının ət maşınında ağır travma nəticəsində amputasiya olunan sol əli təxminən 8 saat davam edən mikrocərrahi əməliyyatla bərpa edilib. Bu barədə Səhiyyə Nazirliyi məlumat yayıb.

Bildirilib ki, sol yuxarı ətrafının ət maşınında sıxılması nəticəsində ağır travmatik amputasiya alan uşaq hadisədən təxminən 7 saat sonra Səhiyyə Nazirliyinin Ə.Əliyev adına Azərbaycan Dövlət Həkimləri Təkmilləşdirmə İnstitutunun Plastik və Rekonstruktiv Cərrahiyyə Klinikasına çatdırılıb.

Travma nəticəsində uşağın sol əl biləyi və əl daraqları, həmçinin baş, işarə, orta və üzük barmaqları tam amputasiya olunub.

Uşaq təcili əməliyyata hazırlanıb. Dilqəm Məmmədov, Bəxtiyar Qasımov və Abidin Həsənlidən ibarət mikrocərrahi komanda, anestezoloqlar Mail Sədiyev və Dayaq Əhmədlinin iştirakı ilə kompleks rekonstruktiv əməliyyat həyata keçirilib.

Əməliyyat zamanı bilək və əl daraqlarının sümük strukturları anatomik vəziyyətdə reduksiya edilərək daxili fiksasiya olunub. Daha sonra fleksor və ekstensor tendonlar, radial və ulnar arteriyalar, median və ulnar sinirlər, eləcə də müvafiq damar və sinir strukturları mikrocərrahi üsulla bərpa edilib.

Təxminən 8 saat davam edən əməliyyatın bütün mərhələləri uğurla tamamlanıb.

Əməliyyatdan sonra uşaq 24 saat reanimasiya şəraitində intensiv monitorinq altında saxlanılıb, vəziyyəti stabil olduqdan sonra postoperativ dövrün ikinci günü palataya köçürülüb.

Hazırda uşağın ümumi vəziyyətinin qənaətbəxş olduğu, rekonstruksiya edilmiş sol yuxarı ətrafın klinik vəziyyətində müsbət dinamikanın müşahidə edildiyi bildirilib.

Həkimlərin sözlərinə görə, ətrafın sağ qalması baxımından kritik postoperativ mərhələ uğurla keçilib. Uşaq uzunmüddətli funksional bərpa məqsədilə mərhələli reabilitasiya proqramına cəlb edilib.