IV Beynəlxalq Minatəmizləmə Konfransı başa çatıb

Azərbaycan Respublikasının Minatəmizləmə Agentliyi (ANAMA) və Birləşmiş Millətlər Təşkilatının (BMT) Azərbaycandakı nümayəndəliyinin birgə təşkilatçılığı ilə keçirilən IV Beynəlxalq Minatəmizləmə Konfransı başa çatıb.

“Şəhərlərin bərpası üçün humanitar minatəmizləmə: Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusunda keçirilən iki günlük konfransda humanitar minatəmizləmə sahəsində yeni tərəfdaşlıqların və birgə təşəbbüslərin inkişafı, eləcə də təcrübə mübadiləsi müzakirə olunub.

Tədbir Azərbaycanın humanitar minatəmizləmə sahəsində beynəlxalq əməkdaşlığa verdiyi töhfələrin təqdim edilməsi üçün də platforma olub.

Konfransın ilk günündə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Prezident İlham Əliyevin tədbir iştirakçılarına müraciətini oxuyub.

Hacıyev mina probleminin bərpa prosesinə təsiri və humanitar minatəmizləmənin bu prosesdəki rolunun müzakirə edilməsi məqsədilə bir araya gələn iştirakçılara təşəkkürünü bildirib və konfransın işinə uğurlar arzulayıb.

Açılış nitqi ilə çıxış edən ANAMA İdarə Heyətinin sədri Vüqar Süleymanov builki konfransın mövzusunun Azərbaycanın təcrübəsini birbaşa əks etdirdiyini bildirib.

BMT-nin Azərbaycandakı rezident əlaqələndiricisi adından çıxış edən Hayat Nasar isə mina təhlükəsi ilə mübarizə fəaliyyətinin uzun müddətdir BMT, Azərbaycan hökuməti və ANAMA arasında əməkdaşlığın əsas istiqamətlərindən biri olduğunu qeyd edib.

Konfrans çərçivəsində bir sıra panel sessiyaları keçirilib, sual-cavab formatında müzakirələr aparılıb.

Tədbirin ikinci günü də panel sessiyaları ilə davam edib. Sonda yekun bəyanat qəbul olunub və konfrans işini başa vurub.