Mobil telefonlardan həddindən artıq istifadə şagirdlərin nəticələrinə mənfi təsir göstərə bilər - Tİ

Şagirdlərin mobil telefon və digər rəqəmsal cihazlardan həddindən artıq istifadəsi onların akademik nəticələrinin zəifləməsinə təsir edən amillərdən biri ola bilər. Bunu  Təhsil İnstitutunun direktor səlahiyyətlərini müvəqqəti  icra edən şəxs Elnur Əliyev bildirib.

Əliyev PISA ilə bağlı təqdimatda deyib ki, aparılmış araşdırmalarda şagirdlərin telefon, planşet və digər rəqəmsal resurslarda keçirdikləri vaxtla onların nəticələri arasında əlaqə müşahidə olunub.

“Bu tip fəaliyyətlərə çox vaxt sərf edən şagirdlər nəticələrdə aşağı gəlirlər”, - Əliyev bildirib.

Onun sözlərinə görə, sorğularda şagirdlərin bir hissəsi sinif yoldaşlarının mobil cihazlardan istifadəsinin dərs zamanı onların diqqətini yayındırdığını və fokuslanmaq imkanını azaltdığını da bildirib.

Əliyev PISA göstəricilərində müşahidə olunan enişi izah edən digər amillərdən birinin oxu bacarıqlarının zəifləməsi ola biləcəyini deyib.

Onun sözlərinə görə, yeni nəsildə böyükhəcmli mətn və kitabları ardıcıl və dərindən oxuma vərdişlərinin zəifləməsi digər bacarıqların inkişafına da mənfi təsir göstərə bilər.

Əliyev bununla belə, bu amillərlə nəticələr arasındakı əlaqənin hazırda müzakirə edilən mülahizə və ehtimallar sırasında olduğunu bildirib.

Gülnar Nazimqızı