BDYPİ əlverişsiz hava şəraiti ilə bağlı sürücülərə müraciət edib

Baş Dövlət Yol Polisi İdarəsi (BDYPİ) qarşıdakı günlərdə gözlənilən qeyri-sabit hava şəraiti ilə əlaqədar sürücüləri diqqətli olmağa çağırıb.

BDYPİ-dən verilən məlumata görə, ölkə ərazisində yağıntıların intensivləşəcəyi və güclü külək əsəcəyi gözlənilir.

İdarə sürücülərə yağışlı havada sürəti yol və hava şəraitinə uyğun seçməyi, ara məsafəsini artırmağı, kəskin manevr və qəfil tormozlamadan çəkinməyi, həmçinin işıq cihazlarından düzgün istifadə etməyi tövsiyə edib.

BDYPİ güclü külək zamanı xüsusilə yük, qoşqulu və tentli nəqliyyat vasitələrinin sürücülərinin küləyin avtomobilin hərəkət dayanıqlığına təsirini nəzərə almasının vacib olduğunu bildirib.

İdarə intensiv yağıntı nəticəsində su basmış və ya sel təhlükəsi olan yol sahələrinə daxil olmamağı, həmin ərazilərdə tətbiq edilən məhdudiyyətlərə və polis əməkdaşlarının göstərişlərinə əməl etməyi tövsiyə edib.

BDYPİ hərəkət iştirakçılarını dəyişkən hava şəraitini nəzərə almağa, yollarda tələsməməyə və təhlükəsizlik qaydalarına riayət etməyə çağırıb.