Lənkəranda 67 yaşlı həkimin əmək müqaviləsinə xitam verilməsi araşdırılır

Lənkəran Rayon Mərkəzi Xəstəxanasında çalışan 67 yaşlı həkim-otorinolarinqoloq Etibar Məmmədovun əmək müqaviləsinə vaxtından əvvəl xitam verildiyi iddia olunur. Bu barədə həkimin oğlu, poliqlot Aslan Məmmədzadə sosial şəbəkə hesabında paylaşım edib.

Məmmədzadə bildirib ki, atası Lənkəran səhiyyə sistemində 40 il fəaliyyət göstərib. Onun sözlərinə görə, iki il əvvəl 65 yaşında təqaüdə çıxan E.Məmmədova xəstəxananın o vaxtkı baş həkimi kadr çatışmazlığı olduğunu bildirərək fəaliyyətini davam etdirməyi təklif edib. Həkim də bu təklifi qəbul edərək müqavilə əsasında işini davam etdirib.

Məmmədzadə iddia edib ki, daha sonra xəstəxanada rəhbərlik dəyişib və İnsan Resursları şöbəsinin müdiri Elbəy Fətəliyev atasına fəaliyyətini davam etdirməsi üçün müəyyən şərtlər irəli sürüb. Onun sözlərinə görə, bu şərtlər qəbul edilmədikdən sonra həkimin əmək müqaviləsinə müddətinin başa çatmasına altı ay qalmış xitam verilib.

Həkimin oğlu müqaviləyə xitam zamanı Əmək Məcəlləsinin tələblərinə əməl olunmadığını da iddia edib. O, atasının “yanlış maddə” ilə işdən çıxarıldığını, proses zamanı psixoloji təzyiq göstərildiyini və müvafiq prosedurlara riayət edilmədiyini bildirib.

Məsələ ilə bağlı Tibbi Ərazi Bölmələrini İdarəetmə Birliyindən (TƏBİB) bildirilib ki, Aslan Məmmədzadə quruma dəvət olunaraq müraciəti dinlənilib.

TƏBİB qeyd edib ki, Etibar Məmmədovun əmək müqaviləsinə xitam verilməsinin qanunvericiliyin və müqavilənin tələblərinə uyğunluğu yoxlanılacaq və araşdırmanın nəticəsi barədə məlumat veriləcək.