Aqrar sığorta 90%-dən çox əkin sahəsini əhatə edir – Yeni bitkilər də əlavə olunacaq

43 bitki növü üzrə sığorta təminatı ölkənin əkin ərazilərinin 90%-dən çoxunu əhatə edir. Bunu Aqrar Sığorta Fondunun İdarə Heyətinin sədr müavini Ləman Əliyeva-Məmişova jurnalistlərə açıqlamasında deyib.

Onun sözlərinə görə, hazırda ölkədə əkilən bitkilərin 90%-dən çoxu Aqrar Sığorta Fondu tərəfindən sığorta təminatı ilə əhatə olunub.

“Bizim sığortaladığımız 43 bitki ölkənin əkin ərazilərinin 90%-dən çox hissəsini əhatə edə bilir. Yəni ölkədə əkilən bitkilərin 90%-dən çoxuna artıq təminat vermişik”, – deyə Fond rəsmisi bildirib.

Ləman Əliyeva-Məmişova qeyd edib ki, növbəti mərhələdə sığorta təminatının əhatə dairəsinin daha da genişləndirilməsi nəzərdə tutulur.

Onun sözlərinə görə, əsas istiqamətlərdən biri hazırda sığorta təminatında olmayan subtropik bitkilərin sistemə daxil edilməsidir. Buraya kivi, feyxoa və digər bitkilər daxildir.

Bundan əlavə, bostan bitkilərinin də sığorta təminatına daxil edilməsi ilə bağlı layihədə dəyişikliklərin nəzərdə tutulduğu bildirilib.

Aytac