Rusiyadan Ermənistana Azərbaycandan tranzitlə 41 vaqon taxıl göndəriləcək

Rusiyadan Ermənistana Azərbaycandan tranzit keçməklə növbəti taxıl tədarükü sentyabrın 10-da həyata keçiriləcək.

Qonşu ölkəyə 20 vaqon arpa və 21 vaqon buğda göndəriləcək. Yük qatarı “Azərbaycan Dəmir Yolları” QSC-nin Biləcəri stansiyasından Böyük Kəsik istiqamətində yola salınacaq.

Bu, Rusiyadan Ermənistana Azərbaycanın dəmir yolu infrastrukturu vasitəsilə həyata keçirilən növbəti tranzit tədarüküdür. Sentyabrın əvvəlində də bu marşrut üzrə 355 ton buğda, 180 ton gübrə və 138 ton taxta göndərilib.

Son aylarda Rusiya-Ermənistan yükdaşımalarında Azərbaycanın tranzit imkanlarından istifadə olunur. Bu marşrutla Ermənistana taxıl, gübrə, propan, alüminium, kömür və digər yüklər daşınıb.