Hakan Fidan Suriyaya səfər edib

Türkiyənin xarici işlər naziri Hakan Fidan Suriyaya səfər edib.Bu barədə "TRT Haber" məlumat yayıb.

Məlumata görə, Fidan səfər çərçivəsində Suriyanın xarici işlər naziri Əsəd Həsən əş-Şeybani ilə görüşəcək. Onun, həmçinin Suriya Prezidenti Əhməd əş-Şəraa tərəfindən qəbul ediləcəyi gözlənilir.

Görüşlərdə Suriyada davam edən inteqrasiya prosesi, o cümlədən Suriya Demokratik Qüvvələrinin (SDQ) özünü buraxması və ölkənin dövlət strukturlarına inteqrasiyası məsələləri müzakirə olunacaq.

Tərəflərin, həmçinin Suriyanın cənubundakı vəziyyəti, İsrailin hücumlarını, ölkənin ərazi bütövlüyü və suverenliyinin qorunmasını müzakirə edəcəyi gözlənilir.

Danışıqlarda Türkiyə ilə Suriya arasında ticarət, enerji və nəqliyyat sahələrində əməkdaşlığın genişləndirilməsi, regional bağlantıların inkişafı və Suriyanın iqtisadi bərpasına dəstək məsələləri də gündəmdə olacaq.