600 min şagird hazırda Azərbaycanda “Rəqəmsal bacarıqlar” layihəsinə cəlb olunub

600 min şagird hazırda Azərbaycanda “Rəqəmsal bacarıqlar” layihəsinə cəlb olunub.

Bunu elm və təhsil naziri Emin Əmrullayev “Baku ID 2026” innovasiya festivalında çıxışı zamanı deyib.

Nazir bildirib ki, layihəyə 10 ildən çox əvvəl 5 min şagirdlə başlanılıb və hazırda bu rəqəm 600 minə çatıb. Onun sözlərinə görə, bu, ölkənin ümumtəhsil məktəblərindəki şagirdlərin təxminən yarısını təşkil edir.

Əmrullayev qeyd edib ki, Azərbaycanda STEAM layihəsi də ilkin mərhələdə təxminən 50 məktəb və bir neçə min şagirdi əhatə etdiyi halda, hazırda layihədə 300 mindən çox şagird iştirak edir.

Nazirin sözlərinə görə, Azərbaycan təhsil sistemində uzunmüddətli inkişafla yanaşı, qısamüddətli nəticələrə imkan verən pilot layihələr də həyata keçirilir.

O bildirib ki, hər il 300-dən çox azərbaycanlı gənc kibertəhlükəsizlik, informasiya texnologiyaları və digər istiqamətlər üzrə təhsil almaq üçün aparıcı xarici universitetlərə göndərilir.

Əmrullayev vurğulayıb ki, Azərbaycanın qarşısında hələ uzun yol var və ölkə bu prosesin başlanğıcındadır.

Aytac