Rövşən Nəcəf: Gələcəyin əsas bacarığı uyğunlaşma qabiliyyəti olacaq

Gələcəkdə əmək bazarında əsas bacarıqlardan biri dəyişən şəraitə uyğunlaşmaq qabiliyyəti olacaq. Bunu SOCAR prezidenti Rövşən Nəcəf “Baku ID 2026” innovasiya festivalında çıxışı zamanı deyib.

Onun sözlərinə görə, avtomatlaşdırma, robototexnika və süni intellektin sürətli inkişafı gələcəkdə hansı bacarıqlara ehtiyac olacağını dəqiq proqnozlaşdırmağı çətinləşdirir.

“Əgər mənə ‘nə olacaq?’ sualını versəniz, cavabını bilmirəm. Çünki süni intellekt sənayesinin aparıcı və parlaq zehinləri də bunu bilmir, dəqiq cavab verə bilmirlər”, - Nəcəf deyib.

O bildirib ki, bu səbəbdən insanlar həm süni intellekt, robototexnika və avtomatlaşdırma ilə işləmək, həm də zərurət yarandıqda bu texnologiyalar olmadan fəaliyyət göstərmək bacarığına malik olmalıdırlar.

Nəcəf qeyd edib ki, peşə təhsilində yeni texnologiyalardan istifadə bacarıqları ilə yanaşı, ənənəvi bacarıqlar da qorunmalıdır.

“Uyğunlaşma bacarığı və ömürboyu təhsil alaraq inkişaf etmək vacibdir. Bu, eyni şeyi daha yaxşı etmək deyil, eyni zamanda və ya lazım gəldikdə fərqli bacarıqları öyrənə bilmək deməkdir”, - o vurğulayıb.

SOCAR prezidenti bildirib ki, süni intellekt və digər texnologiyalardan həddindən artıq asılılıq insanların kritik düşünmə və mühakimə yürütmə bacarıqlarını itirməsinə səbəb ola bilər.

“Əgər kritik mühakimə yürütmə və kritik düşünmə qabiliyyətimizi də itirib hər şeyi süni intellektə həvalə etsək, bu, geri dönülməz bir proses ola bilər”, - Nəcəf deyib.

Aytac