Özbəkistan və Qazaxıstan prezidentləri gələn ay Azərbaycana gələcək

Özbəkistan Prezidenti Şavkat Mirziyoyev və Qazaxıstan Prezidenti Kasım-Jomart Tokayev gələn ay Azərbaycana səfər edəcəklər.

Prezident İlham Əliyev bunu Türk Dövlətləri Təşkilatına (TDT) üzv ölkələrin təhlükəsizlik üzrə rəhbər şəxslərini qəbul edərkən bildirib.

İlham Əliyev Özbəkistan Prezidenti yanında Təhlükəsizlik Şurasının katibi Viktor Mahmudova müraciətlə Şavkat Mirziyoyevə salamlarını çatdırmasını xahiş edib.

“Şavkat Miromonoviçə ən xoş arzularımı çatdırın. Həmçinin gələn ay onu Azərbaycanda keçiriləcək beynəlxalq tədbirdə gözləyirik”, - dövlət başçısı deyib.

Prezident həmçinin Qazaxıstan Prezidenti Kasım-Jomart Tokayevin də gələn ay Azərbaycana səfər edəcəyini bildirib.

İlham Əliyev bunu Qazaxıstan Respublikası Təhlükəsizlik Şurası sədrinin müavini Aida Balayevaya deyib.

“Bu yaxınlarda Bişkekdə Kasım-Jomart Kemeleviçlə görüşdük və gələn ay onu yenidən Azərbaycanda gözləyirik”, - Prezident bildirib.

Qeyd edək ki, oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) sammitinin keçirilməsi planlaşdırılır.