Komitə sədri: Azərbaycanda xırdabuynuzlu heyvanların sayı 3 milyondan çox azalıb

Azərbaycanda xırdabuynuzlu heyvanların sayı üç milyondan, iribuynuzlu heyvanların sayı isə bir milyondan çox azalıb. Bunu Milli Məclisin Aqrar siyasət komitəsinin sədri Tahir Rzayev bildirib.

Rzayev azalmanın əsas səbəblərindən biri kimi quzu və buzovların yetişdirilmədən kütləvi şəkildə kəsilməsini göstərib.
“Bu quzu gələcəkdə qoyun və ya qoç, buzov isə inək olmalıdır. Amma heyvanlar böyümədən kəsilir və təsərrüfatın davamı yaranmır”, - o, parlamentdə deyib.

Komitə sədrinin sözlərinə görə, aqrar siyasətin məqsədi daha iri və məhsuldar təsərrüfatların yaradılması olmalıdır, çünki subsidiyaların belə təsərrüfatlarda istifadəsi daha böyük iqtisadi səmərə verə bilər.

“Orta və kiçik sahibkarlıq inkişaf etdirilməlidir. Ancaq qarşıya qoyulan məqsəd daha iri təsərrüfatlar yaratmaq və subsidiyaların faydasını artırmaqdır”, -Rzayev bildirib.

O əlavə edib ki, fermerlərin maliyyə imkanlarının genişlənməsi gübrə, texnika və digər resurslar bazarında rəqabəti artıracaq.

“Fermerin pulu olacaqsa, gübrə satan da, texnikası olan da onun yanına gələcək. Fermer seçim edə biləcək və ona keyfiyyətsiz gübrə satmaq çətinləşəcək”, - komitə sədri deyib.

Rzayev bildirib ki, “məhsul şəhadətnaməsi” buraxan fermer götürdüyü öhdəliyi yerinə yetirməli, bunu etmədikdə isə sənəd birbaşa icraya yönəldilməlidir.
“Məhsul şəhadətnaməsini buraxan şəxsin məsuliyyəti olacaq ki, gələcəkdə öhdəliyini yerinə yetirsin, məhsulu vaxtında və keyfiyyətli şəkildə təqdim etsin”, - o deyib.

Gülnar Nazimqızı