Azərbaycanda ilk dəfə xərçəng diaqnozu qoyulanların sayı 15 ildə 73% artıb

Azərbaycanda ilk dəfə bədxassəli şiş diaqnozu qoyulanların sayı 2025-ci ildə əvvəlki illə müqayisədə 0,5% azalaraq hər 100 min nəfərə 147,8 nəfər təşkil edib. Bu barədə Dövlət Statistika Komitəsinin hesabatında qeyd olunub.

2024-cü ildə bu göstərici hər 100 min nəfərə 148,6 nəfər olub.

Ölkədə bədxassəli şişlərlə qeydiyyatda olan xəstələrin sayı da hər 100 min nəfərə 722,5-dən 721,1-ə enib və illik müqayisədə 0,2% azalıb.

İlk dəfə xərçəng diaqnozu qoyulanların göstəricisi 2010-cu ildə hər 100 min nəfərə 85,4 nəfər olduğu halda, 2025-ci ildə 147,8 nəfərə çatıb. Bu, 15 il ərzində 73% artım deməkdir.

Eyni dövrdə bədxassəli şişlərlə qeydiyyatda olan xəstələrin göstəricisi hər 100 min nəfərə 312 nəfərdən 721,1 nəfərə yüksələrək 2,3 dəfə artıb.

Gülnar Nazimqızı