LSEG: Azərbaycan şirkətləri kapital bazarlarından daha fəal istifadə edə bilər

Azərbaycan şirkətlərinin yerli və beynəlxalq kapital bazarlarına çıxışı maliyyələşmənin şaxələndirilməsi ilə yanaşı, onların beynəlxalq tanınmasına və bazar dəyərinin formalaşmasına imkan yaradır. Bunu London Stock Exchange Group-un (LSEG) ilkin bazarlar üzrə Avropa rəhbəri Ayuna Nechaeva AIIF 2026 çərçivəsində keçirilən panel müzakirəsində deyib.

O bildirib ki, Azərbaycanda kapital çatışmazlığı müşahidə edilmir və ölkə yaxşı kapitallaşıb. Nechaeva qeyd edib ki, birjada listinq şirkətlərə səhmlərdən birləşmə və satınalma əməliyyatlarında istifadə etməyə, həmçinin investorlar üçün likvidlik yaratmağa imkan verir.

LSEG rəsmisi kapital bazarlarının iqtisadiyyatın şaxələndirilməsində mühüm rol oynadığını vurğulayıb. Onun sözlərinə görə, səhm bazarlarının inkişafı investisiya portfellərinin, o cümlədən pensiya fondlarının portfellərinin genişlənməsinə şərait yaradır.

Nechaeva bildirib ki, LSEG şirkətləri hazır olmadan listinqə çıxmağa təşviq etmir və əsas məqsəd listinqdən sonra şirkətlərin uzunmüddətli fəaliyyətinin və səhmlərin likvidliyinin təmin edilməsidir.

O, Özbəkistan və Qazaxıstanda yerli fond birjaları ilə London Fond Birjası arasında həyata keçirilən ikili və üçlü listinq modellərini də nümunə göstərib.

Aytac