Sumqayıtda vaxtı keçmiş şirniyyatdan zəhərlənən şagirdlərin sayı 21-ə çatıb

Sumqayıt şəhər 36 nömrəli tam orta məktəbdə zəhərlənmə şübhəsi ilə xəstəxanaya yerləşdirilən şagirdlərin sayı 21-ə çatıb.

TƏBİB-in məlumatına görə, oktyabrın 2-də saat 10:20-dən başlayaraq 17-si oğlan, 4-ü qız olmaqla 21 nəfər Sumqayıt Tibb Mərkəzinin Uşaq Xəstəxanasının Yoluxucu xəstəliklər şöbəsinə hospitalizasiya olunub.

Hazırda onların müalicəsi davam etdirilir və vəziyyətləri stabil qiymətləndirilir.

Azərbaycan Qida Təhlükəsizliyi Agentliyi (AQTA) hadisəni nəzarətə götürərək araşdırmaya başlayıb.

Agentliyin ilkin araşdırmasına görə, hadisəyə şagirdlərdən birinin məktəbə gətirdiyi istifadə müddəti bitmiş şirniyyat məhsulu səbəb olub.

Abşeron-Xızı Regional Təhsil İdarəsindən bildirilib ki, şagirdlərdən biri evdən gətirdiyi qənnadı məmulatını sinif yoldaşları ilə bölüşüb. Həmin qidadan istifadə etdikdən sonra məktəblilərin özlərini pis hiss etdiyi müəyyənləşdirilib.

Məktəb rəhbərliyi hadisəni nəzarətə götürüb, şagirdlər tibb müəssisəsinə yönləndirilib. Hadisənin səbəblərinin müəyyənləşdirilməsi istiqamətində aidiyyəti qurumlarla birgə araşdırma aparılır.

AQTA araşdırmaların davam etdiyini və görülən tədbirlər barədə ictimaiyyətə əlavə məlumat veriləcəyini açıqlayıb.

Ötən gün Gəncə şəhərində Cəfər Cabbarlı adına 6 nömrəli tam orta məktəbin 7 şagirdi də şirniyyatdan zəhərlənmə şübhəsi ilə xəstəxanaya yerləşdirilmişdi.

Gülnar Nazimqızı