DİN: Məktəb qarşısında uşaqlara konfet paylayan naməlum şəxslə bağlı iddialar təsdiqlənməyib

Sosial şəbəkələrdə məktəb qarşısında naməlum şəxsin uşaqlara konfet paylaması və bundan sonra şagirdlərin zəhərlənməsi ilə bağlı yayılan səs yazısındakı iddialar təsdiqini tapmayıb.

Daxili İşlər Nazirliyinin (DİN) Mətbuat Xidmətindən bildirilib ki, sosial şəbəkələrdə yayılan səs yazısı ilə bağlı araşdırma aparılıb və səsləndirilən iddialar öz təsdiqini tapmayıb.

“Vətəndaşlardan xahiş olunur ki, mənbəyi və doğruluğu müəyyən edilməmiş məlumatları yaymasınlar, xüsusilə də uşaqların sağlamlığı və təhlükəsizliyi ilə bağlı belə məlumatların ictimaiyyətdə əsassız narahatlıq yaratmasına şərait yaratmasınlar”, - deyə DİN-in məlumatında qeyd olunub.

 Daha əvvəl Sumqayıtda məktəblilər arasında zəhərlənmə şübhəsi ilə bağlı hadisə qeydə alınıb. TƏBİB-in son məlumatına görə, 21 şagird xəstəxanaya yerləşdirilib. AQTA ilkin araşdırmada hadisəyə şagirdlərdən birinin evdən gətirdiyi vaxtı keçmiş şirniyyatın səbəb olduğunu bildirib.

Gülnar Nazimqızı