Azərbaycanda əmək pensiyalarının növbəti indeksləşdirilməsi diferensial həyata keçirilə bilər

Azərbaycanda əmək pensiyalarının növbəti indeksləşdirilməsinin diferensial qaydada həyata keçirilməsi gözlənilir. Bu dəyişiklik təxminən 1,1 milyon vətəndaşı əhatə edə bilər.

Bunu Milli Məclisin deputatı Vüqar Bayramov Prezident İlham Əliyevin gələn il minimum əməkhaqqı, pensiya və sosial müavinətlərin artırılacağı ilə bağlı açıqlamasına münasibət bildirərkən deyib.

Onun sözlərinə görə, gələn ilin yanvarından bütün növ əmək pensiyalarının indeksləşdirilərək artırılması nəzərdə tutulur.

“İndeksləşdirmənin yeni müzakirə edilən dəyişikliklərə əsasən diferensial həyata keçiriləcəyi gözlənilir. Dəyişikliyə əsasən, pensiya sistemində sosial haqlara əsaslanan modelin genişləndirilməsi nəzərdə tutulur. Mövcud qaydalara əsasən, hazırda pensiyalar əvvəlki ildə orta aylıq əməkhaqqının artım faizinə indeksləşdirilir. Yenə də meyar əvvəlki ildə orta aylıq əməkhaqqının artım faizidir. Amma bununla belə, diferensial yanaşma olacaq”, - deyə deputat bildirib.

V.Bayramovun sözlərinə görə, nəzərdə tutulan artımlar növbəti sosial paketin gələn ilin əvvəlində reallaşdırılması deməkdir.

Deputat bildirib ki, Azərbaycanda minimum əməkhaqqının artırılması mütəmadi xarakter alacaq. Onun sözlərinə görə, 2027-ci ilin fevralına qədər minimum əməkhaqqının artırılması gözlənilir.

V.Bayramov əlavə edib ki, 2027-ci ilin dövlət büdcəsindən sosial sahəyə ayrılan vəsait ümumi xərclərin 44 faizini təşkil edəcək. Bu, 18,5 milyard manatdan çox vəsait deməkdir.

“Bu, yeni sosial paketin anonsudur”, - deyə deputat vurğulayıb.