ABŞ sahillərində itmiş təyyarənin qalıqları aşkarlanıb

ABŞ Sahil Mühafizəsi Massaçusets ştatının Nantaket adası yaxınlığında itkin düşən tibbi təyyarənin qalıqlarını aşkarlayıb.

ABŞ Sahil Mühafizəsinin məlumatına görə axtarış qrupları qalıqları müəyyənləşdirib və onların itkin təyyarəyə aid olduğu təsdiqlənib.

Təyyarədə olan altı nəfərin axtarışı davam etdirilir. Onların dördünün Kanada, ikisinin isə Bermud adaları vətəndaşı olduğu bildirilir.

Kanadada qeydiyyatda olan "Gulfstream G100" tibbi təyyarəsi Bermud adalarından Bostona uçarkən oktyabrın 3-də səhər saatlarında əlaqədən çıxıb. Təyyarədə dörd ekipaj üzvü və iki sərnişin olub.

ABŞ Sahil Mühafizəsi axtarış-xilasetmə əməliyyatını hava və dəniz vasitələri ilə davam etdirir.