Almaniyada yüngülmotorlu təyyarə qəzaya uğrayıb, 2 nəfər ölüb

Almaniyanın Baden-Vürtemberq federal torpağının Heylbronn dairəsində, Gündelşaym şəhəri yaxınlığında yüngülmotorlu təyyarə qəzaya uğrayıb, göyərtəsindəki iki nəfər həlak olub.Bu barədə SWR polisə istinadən məlumat yayıb.

Bildirilib ki, qəza təyyarənin enişi zamanı baş verib. İki nəfərin olduğu təyyarə əvvəlcə hasara ilişib, daha sonra ağaca çırpılıb və üzüm bağında yerə düşərək yanıb.

Hadisə yerinə polis, yanğınsöndürənlər və digər xilasetmə xidmətlərinin əməkdaşları cəlb olunub. Yanğın söndürülüb.

Qəzanın səbəbi hələlik məlum deyil. Polis və müvafiq mütəxəssislər hadisənin səbəblərini araşdırırlar.