Daha çox sahə əkmək və resurs istifadə etmək məntiqindən uzaqlaşmalıyıq - Məcnun Məmmədov

Azərbaycan kənd təsərrüfatında daha az resursla daha çox və daha dəyərli məhsul istehsalına, habelə xammal əvəzinə emal olunmuş və brendləşmiş məhsulların ixracına keçməlidir. Bunu kənd təsərrüfatı naziri Məcnun Məmmədov bildirib.

“Biz daha çox sahə əkək, daha çox heyvan saxlayaq, daha çox resurs istifadə edək və daha çox məhsul istehsal edək məntiqindən uzaqlaşmalıyıq”, - Məmmədov deyib.

Onun sözlərinə görə, əsas məqsədlərdən biri ekstensiv kənd təsərrüfatından intensiv istehsala keçidə nail olmaqdır.

Nazir bildirib ki, istehsal ərzaq təhlükəsizliyini dəstəkləməli və ölkəyə valyuta gətirən ixrac məhsullarının həcmini artırmalıdır.

O, məhsulların yerli və xarici bazarlara xammal kimi deyil, emal edilmiş və daha yüksək əlavə dəyərə malik formada çıxarılmasının vacibliyini vurğulayıb.

Gülnar Nazimqızı