Azərbaycan Ermənistana 2 mindən çox erməni hərbçinin qalıqlarını təhvil verib

Azərbaycan 2020-ci ilin noyabrından etibarən Ermənistan tərəfinə 2 mindən çox erməni hərbçisinin qalıqlarını təhvil verib. Bunu Azərbaycan xarici işlər nazirinin müavini Fariz Rzayev bildirib.

Onun sözlərinə görə, axtarış işləri mina və digər partlamamış hərbi sursatların yaratdığı təhlükələrə baxmayaraq aparılıb.

Rzayev həmçinin bildirib ki, Azərbaycan İtkin Düşmüş Şəxslər üzrə Beynəlxalq Komissiya (ICMP) ilə birgə inteqrasiya olunmuş məlumatların idarə edilməsi sisteminin və onunla əlaqəli onlayn sorğu mərkəzinin ilkin tətbiqi üzərində işləyir.

Sistem itkin düşmüş şəxslər barədə mövcud məlumatların vahid bazada birləşdirilməsi, səlahiyyətli qurumların məlumatları idarə etməsi və müqayisə etməsi üçün nəzərdə tutulub. Onlayn sorğu mərkəzi isə itkin düşmüş şəxslər və dəfn yerləri barədə məlumatların məxfi şəkildə ötürülməsinə imkan verəcək.

Rzayev qeyd edib ki, Azərbaycanın ICMP ilə əməkdaşlığı 2022-ci ildə imzalanmış protokol əsasında inkişaf etdirilir. Komissiya məhkəmə-tibbi ekspertiza, DNT analizi və məlumatların idarə edilməsi sahələrində texniki ekspertiza və təlim dəstəyi göstərir.

Aytac Zeynalova